Motoristët nisen nga Prekazi drejt Hagës në mbështetje të ish-krerëve të UÇK-së
Nga Kompleksi Memorial “Adem Jashari” në Prekaz, sot është bërë nisja e marshit simbolik me motoçikleta drejt Hagës, i organizuar nga platforma “Liria ka Emër”, me qëllim për të shprehur mbështetje për drejtësinë dhe për ish-krerët e Ushtrisë Çlirimtare të Kosovës që po gjykohen në Hagë.
Organizatori i marshit, Ismail Tasholli, tha se ky rrugëtim bart një mesazh të fortë simbolik dhe kombëtar.
“Sot e kemi filluar marshin. Synimi ynë është që karvanit t’u bashkohen pjesëtarë nga qytete të ndryshme të Kosovës dhe diasporës. Do të ndalemi në Cyrih dhe më pas në Dyseldorf, ndërsa më 19 tetor do të arrijmë në Hagë”, tha Tasholli në emisionin “Mesditë” në Tëvë1.
Ai theksoi se nisja nga Prekazi nuk është e rastësishme, por mbart kuptimin historik të sakrificës dhe lirisë.
“Prekazi është pikënisja e çdo shqiptarizmi. Mesazhi ynë është i qartë – ‘Liria ka emër’. Kërkojmë drejtësi, transparencë dhe gjykim të paanshëm, jo politik”, u shpreh ai.
Sipas tij, marshit do t’i bashkohen qindra motoristë nga vende të ndryshme të Evropës, përfshirë Italinë, Holandën, Greqinë dhe Zvicrën, ndërsa në Bruksel, pranë Parlamentit Evropian, do të dorëzohet një kërkesë për transparencë dhe monitorim të procesit gjyqësor në Hagë.
“Nuk do të mbajmë fjalime gjatë rrugëtimit, për të mos e politizuar marshin dhe për të ruajtur karakterin e tij simbolik”, shtoi Tasholli.
Në Dhomat e Specializuara të Kosovës me seli në Hagë, po zhvillohet gjykimi ndaj ish-drejtuesve të Ushtrisë Çlirimtare të Kosovës – Hashim Thaçi, Kadri Veseli, Jakup Krasniqi dhe Rexhep Selimi – të cilët po përballen me akuza për krime lufte dhe krime kundër njerëzimit.
