Presidenti i SHBA-së, Donald Trump, njoftoi të martën nisjen e “fazës së dytë” të marrëveshjes së armëpushimit në Gaza, pasi u liruan 20 pengje izraelite në kuadër të fazës së parë të marrëveshjes, e ndërmjetësuar nga Turqia, SHBA-të, Katari dhe Egjipti.
“Të njëzet pengjet janë kthyer dhe ndihen aq mirë sa mund të pritet”, shkroi Trump në platformën e tij të mediave sociale, Truth Social.
“Një barrë e madhe është hequr, por puna nuk është kryer. Të vdekurit nuk janë kthyer, siç ishte premtuar! Faza e dytë fillon tani!!!” shtoi ai.
Gjatë shkëmbimit të pengjeve dhe të burgosurve mes Hamasit dhe Izraelit, qindra të burgosur palestinezë u liruan nga burgu ushtarak famëkeq Ofer në Izrael dhe nga burgje të tjera në shkretëtirën Negev. Njëkohësisht, u liruan edhe 20 pengjet izraelite që ishin ende gjallë.
Trump dhe Presidenti egjiptian, Abdel Fattah al-Sisi zhvilluan një samit të nivelit të lartë të hënën në qytetin turistik egjiptian Sharm el-Sheikh, duke mbledhur liderë botërorë për të siguruar mbështetje ndërkombëtare për planin e Trump për armëpushim në Gaza.
Sipas fazës së dytë të marrëveshjes së ndërmjetësuar nga SHBA-të, parashikohet krijimi i një mekanizmi të ri qeverisës në Gaza, formimi i një force shumëkombëshe dhe çarmatimi i Hamasit.
Që nga tetori i vitit 2023, sulmet izraelite kanë vrarë mbi 67,000 palestinezë në Gaza, shumica gra dhe fëmijë, duke e bërë enklavën pothuajse të pabanueshme.
