Ish-presidentja e Kosovës, Atifete Jahjaga, ka zhvilluar një vizitë zyrtare në Komandën e Forcave të Përbashkëta të NATO-s në Napoli, Itali, me ftesë të admiralit Stuart Munsch, komandant i kësaj strukture që mbulon Evropën, Lindjen e Mesme dhe Afrikën.
Gjatë vizitës, Jahjaga ka bashkëbiseduar me ekipin drejtues të Komandës për integrimin e Agjendës për Gratë, Paqen dhe Sigurinë në operacionet aktuale dhe të ardhshme të NATO-s, si dhe për rolin që Kosova luan si partnere e përkushtuar për paqe dhe stabilitet në rajon.
Ajo ka përgëzuar admiral Munsch për punën e jashtëzakonshme të NATO-s dhe misionit të KFOR-it në Kosovë, të cilët prej më shumë se dy dekadash kanë garantuar siguri për qytetarët e vendit.
“Gjithmonë falënderuese për intervenimin e NATO-s në vitin 1999, hap ky që shpëtoi një popull të tërë nga gjenocidi serb dhe hapi rrugën drejt lirisë”, ka theksuar Jahjaga.
Në përmbyllje të vizitës, ish-presidentja shprehu mirënjohje të thellë për partneritetin, miqësinë dhe udhëheqjen e NATO-s, duke theksuar se paqja ruhet jo vetëm përmes forcave ushtarake, por edhe përmes vlerave demokratike të përbashkëta.
