Politologia Arta Tahiri-Beqa ka vlerësuar se në zgjedhjet lokale të mbajtura më 12 tetor, asnjë subjekt politik nuk ka dalë fitues i qartë.
Sipas Tahiri-Beqajt, këto zgjedhje kanë sjellë ndryshime në strukturat dhe partitë politike, krahasuar me zgjedhjet e kaluara lokale.
Ajo ka theksuar se qytetari i Kosovës ka hyrë në një fazë të re të ndërgjegjësimit politik, ku kërkon llogaridhënie dhe dënon me votë.
“Nëse shohim përqindjen e votave, përqindjen e komunave dhe faktin që shumë prej tyre shkojnë në balotazh, shihet qartë se qytetari i Kosovës ka kaluar në një stad tjetër, atë të kërkesës për llogaridhënie nga pushteti. Ka komuna ku qytetari ka dhënë një mundësi të re pa balotazh, dhe të tjera ku ka ndëshkuar qartë. Dua të them se nuk ka fitues të qartë pasi kemi të bëjmë me një shpërndarje më të balancuar të pushtetit. Ka ndryshime si në struktura ashtu edhe në parti politike. Nuk është më e njëjta gjendje si më parë. Kjo na jep mundësi për të krahasuar zgjedhjet lokale, pasi ato po mbahen çdo katër vjet. Prandaj them: askush nuk ka fituar. Asnjë subjekt nuk i ka marrë qytetet e mëdha për t’u krenuar dhe bastionet kanë ndryshuar”, ka deklaruar ajo në emisionin “Këndi i Debatit” në Tëvë1.
