Mbi 60 autobusë do të nisen nga Kosova drejtë Tiranës më 17 tetor për të marrë pjesë në protestën e organizuar nga Organizata e Veteranëve të Luftës së Ushtrisë Çlirimtare të Kosovës në përkrahje të luftës së UÇK-së.
Kështu deklaroi në një konferencë për medie kryetari i OVL-UÇK-së, Hysni Gucati i cili tha se për këtë protestë kanë gjetur mbështetje të madhe nga qytetarët por edhe institucionet shqiptare.
Ai tha se tashmë është e konfirmuar që në protestë do të marrë pjesë edhe kryeminatori, Edi Rama.
Organizata e Veteranëve të Luftës së Ushtrisë Çlirimtare të Kosovës, ka bërë thirrje publike për një protestë mbarëkombëtare që do të mbahet në Tiranë, në sheshin “Skënderbeu”.
Protesta në kryeqytetin shqiptar vjen pas atyre të organizuara në Prishtinë dhe Hagë, ku me mijëra qytetarë kanë kërkuar drejtësi dhe lirimin e ish-krerëve të UÇK-së – Hashim Thaçit, Kadri Veselit, Jakup Krasniqit dhe Rexhep Selimit – të cilët ndodhen në paraburgim që nga nëntori i vitit 2020.
