Kryetari i Lidhjes Demokratike të Kosovës (LDK), Lumir Abdixhiku, ka vlerësuar se ky subjekt politik është fituesi i zgjedhjeve lokale, duke marrë 180 mijë vota për Kuvendet Komunale.
Sipas Abdixhikut, LDK-ja sot është më e fortë, më e organizuar dhe më e lidhur me qytetarët se kurrë më parë.
Ai theksoi se politika është një garë e gjatë, një maratonë, dhe si LDK kanë treguar se dinë të fitojnë, por edhe të qëndrojnë me dinjitet kur janë një hap larg fitores.
“Ne, si LDK, kemi dëshmuar se dimë të fitojmë, por edhe dimë të qëndrojmë me dinjitet kur na mungon një hap deri te fitorja. Kokën lart të gjithë. Sepse LDK-ja sot është më e fortë, më e organizuar dhe më e lidhur me njerëzit se kurrë më parë. Ju jeni dëshmia e kësaj. LDK ka sot mbi 180 mijë vota për Kuvende Komunale, dhe pa dyshim është partia e parë nga këto zgjedhje lokale. Rrugëtimi ynë vazhdon. Me të njëjtin përkushtim, me të njëjtën besë dhe me të njëjtin qëllim. Ju faleminderit nga zemra për fushatën, për punën, për besimin,” ka shkruar ai në Facebook.
Abdixhiku gjithashtu ka shprehur mirënjohje për kandidatët për kryetarë komunash për punën, përkushtimin dhe dinjitetin e treguar gjatë fushatës.
“Sot dua t’ju drejtohem me mirënjohjen më të thellë për punën, përkushtimin dhe dinjitetin që keni treguar në këtë fushatë. Secili prej jush ka qenë zëri, fytyra dhe energjia e LDK-së në çdo qytet, lagje e fshat të Kosovës. Keni qëndruar me dinjitet, me argument, me kulturë e me dashuri për vendin; siç i ka hije shtëpisë së demokracisë. Sot, disa e festojnë fitoren. Imriu, Iliri e Ruzhdiu festojnë në raundin e parë. Festojmë për ta të gjithë. E merituat me punë, me durim dhe besim. Urime për çdo sukses që e keni ndarë me qytetarët tuaj, për çdo fitore që është fitore e përbashkët e LDK-së dhe e gjithë Kosovës. Deri më sot keni qenë kandidat vetëm të LDK-së, nga sot e tutje jeni kryetarë të të gjithëve, pa dallim. Silluni si të tillë. Disa të tjerë, 9 sosh, i kemi në garë për një raund të ri. Le të fitojmë! Ata që nuk e morën rezultatin që e merituan, kokën lart. Mos e merrni si humbje, sepse gara nuk është e tillë. Është përvojë, është themel për fitoret e ardhshme, është dëshmi se LDK ka njerëz të guximshëm që nuk dorëzohen kurrë,” ka theksuar ai.
