Kryeministri në detyrë, Albin Kurti, ka njoftuar se këtë javë do të fillojë bisedimet me partitë e tjera për formimin e qeverisë së re.
Në një konferencë për media, Kurti ka theksuar se afati për të paraqitur kabinetin e ri qeveritar është 26 tetori.
Megjithatë, sipas tij, nëse bisedimet janë të suksesshme, Qeveria Kurti 3 mund të formohet edhe para kësaj date.
“Dita e fundit kur mund të mbahet seanca e Kuvendit, ku unë do të prezantoj kabinetin e ri qeveritar, është 26 tetori. Këto ditë jemi të përqendruar maksimalisht në analizën gjithpërfshirëse dhe të hollësishme të rezultateve të zgjedhjeve lokale, por shumë shpejt, që në këtë javë, do të fillojmë komunikimin dhe bisedimet edhe për qeverinë qendrore. Kosova ka nevojë për një mandat të ri të qeverisë sonë dhe neve na duhet një mandat i ri, në përputhje me rezultatin e 9 shkurtit të këtij viti. Unë theksova se 26 tetori është afati i fundit, por kjo nuk do të thotë se seanca për qeverinë e re do të mbahet patjetër atë ditë. 26 tetori është thjesht dita e fundit kur mund të realizohet, sepse tani po numërojmë pas, ndërsa më herët nuk kishte afate dhe nuk numëronim pas, por vetëm përpara. Po ashtu, kam vënë theksin në periudhën 15-ditore, e cila përfundon më 26 tetor. Në momentin që bisedimet dhe komunikimi të kenë qenë të suksesshëm, do të veprojmë menjëherë dhe nuk do të presim 26 tetorin”, ka deklaruar Kurti.
Kurti është pyetur për partnerin ideal për qeverisjen qendrore, por ka refuzuar të japë një përgjigje të drejtpërdrejtë, duke theksuar se komunikimi dhe bisedat që do të zhvillohen do të përcaktojnë përbërjen e shumicës së re në Kuvendin e Kosovës që do të votojnë për Qeverinë Kurti 3.
Ai ka shtuar se për momentin, duhet t’i lënë kohën këtyre komunikimeve dhe bisedimeve, duke theksuar se nuk mund të flasë më shumë në këtë fazë.
Në fund, kryeministri në detyrë ka theksuar se LVV-ja është e gatshme për zgjedhje të reja nëse nuk formohet Qeveria Kurti 3.
“Ne po bëhemi gati të qeverisim më shumë se kurrë në komuna anembanë Kosovës, të rikthehemi në qeverisje në kryeqytet dhe, që është shumë e rëndësishme, po përgatitemi për Qeverinë Kurti 3. Nëse nuk ka mundësi për formimin e Qeverisë Kurti 3, pa dyshim që jemi të gatshëm për zgjedhje të reja parlamentare. Plani ynë mbetet formimi i Qeverisë Kurti 3”, është shprehur ai./teve1.info/
