Qeveria në detyrë e Republikës së Kosovës ka miratuar ndarjen e mbi 550 mijë eurove për disa iniciativa që prekin komunitetin shqiptar në Luginën e Preshevës, familjen e policit të vrarë Afrim Bunjaku dhe projekte infrastrukturore në Mitrovicën e Veriut.
Sipas vendimit të miratuar në mbledhjen elektronike të mbajtur më 10 tetor, janë ndarë 304 mijë euro për furnizimin me mbi 35 mijë tekste shkollore për 3,650 nxënës shqiptarë të shkollave fillore në Luginën e Preshevës. Po ashtu, një pjesë e mjeteve do të përdoret për avokimin dhe ndërkombëtarizimin e çështjes së Luginës në Shtetet e Bashkuara të Amerikës, Bashkimin Evropian dhe organizata të tjera ndërkombëtare. Fondet do të transferohen te Këshilli Kombëtar Shqiptar.
Në të njëjtën mbledhje, kabineti qeveritar ka ndarë 50 mijë euro për familjen e policit Afrim Bunjaku, i cili humbi jetën në sulmin terrorist në Banjskë më 2023. Mjetet do të përdoren për ndërtimin e një hapësire pritjeje publike që do t’u shërbejë qytetarëve dhe do të mbajë emrin e policit, si shenjë respekti për jetën dhe sakrificën e tij.
Ndërkohë, janë ndarë edhe 200 mijë euro për renovimin e objektit të Ministrisë së Financave, Punës dhe Transfereve në Mitrovicën e Veriut, që do të përdoret nga Administrata Tatimore e Kosovës.
