Ministri në detyrë i Bujqësisë, Faton Peci dhe kandidati për kryetar të komunës së Mitrovicës së Jugut ka thënë se ish- presidenti Hashim Thaçi i ka kontribuar ndarjes së Kosovës.
Ai ka thënë se Thaçi në vitin 2018, ka pasur në planë që kufirin e Kosovës ta sjellë në urën e Ibrit.
“Hashim Thaçi, me vjen keq për gjendjen në të cilën gjendet ai dhe rrethanat, por është akteri që i ka kontribuuar ndarjes së Kosovës dhe që ka pas gisht për ndarjen e Kosovës dhe që në vitin 2018, Kosovës ka pas me ja sjellë kufirin në urën e Ibrit”, është shprehur Peci.
Sipas tij, shefi i në qeveri, Albin Kurti ishte ai që largoi bandat kriminale në këtë pjesë të vendit.
Ai ka thënë se Thaçi e Kurti për Mitrovicën e Jugut dhe Veriut janë anët e ndryshme të medaljes.
“Hashimi dhe Albini për Mitrovicën dhe veriun paraqesin krejt dy anë të kundërta të medaljes. Hashimi që ka punuar me nda Kosovën në urën e Ibrit dhe që ka vlerësuar se në gjithë pjesën veriore nuk ka varr shqiptarë dhe s’kemi çka lypim atje se është dhuratë e Rankoviqit dhe Albin Kurti i cili e ka shporr krejt mekanizmin shtetëror të Aleksander Vuçiqit në veri dhe e ka kthyer sovranitetin. Në Mitrovicë nuk mundesh me kanë edhe me Hashimin edhe me Albinin”, ka thënë ai.
