Prokuroria e Tiranës ka ngritur akuza ndaj tre personave të arrestuar për vrasjen e gjyqtarit Astrit Kalaja dhe plagosjen e dy shtetasve të tjerë gjatë një seance gjyqësore në Gjykatën e Apelit duke kërkuar masën e sigurisë “arrest me burg”.
Akuzat përfshijnë “Vrasje e funksionarëve publikë”, “Vrasja në rrethana të tjera cilësuese”, “Mbajtja pa leje e armëve” dhe “Shpërdorim detyre”.
Autori Elvis Shkambi, 30 vjeç, akuzohet për vrasjen e gjyqtarit dhe plagosjen e dy shtetasve të tjerë.
Prokuroria thotë se ai ka vrarë gjyqtarin Kalaja në sallën e gjyqit, dhe ka plagosur babë e bir. Po ashtu, ai është akuzuar për mbajtje dhe prodhim të armëve pa leje.
Prokuroria akuzon autorin Elvis Shkambi, për “Vrasje e funksionarëve publik”, “Vrasja në rrethana të tjerë cilësuese”, kundër palëve ndërgjyqësve dhe “Mbajtja pa leje dhe prodhimi i armëve, armëve shpërthyese dhe municionit”.
Gjithashtu prokuroria ka zbardhur edhe rolin e i xhaxhait të autorit, Gjon Shkambi, i cili akuzohet për “Vrasje në rrethana të tjera cilësuese”, pasi dyshohet se ka pasur dijeni për veprimet kriminale të nipit të tij, pa ndërmarrë asnjë veprim për t’i parandaluar ato.
Prokuroria gjithashtu përmend kërcënimet publike që Gjon Shkambi ka bërë për vrasjen e palëve të gjyqit dhe një sërë ngjarjesh të kallëzuara nga viktimat për kërcënime me jetë.
“Nga pamjet filmike ai ka qëndruar i qetë gjatë kryerjes së veprës dhe pas kryerjes së saj, çka krijon dyshimin e arsyeshëm, që ai ka pasur dijeni për planin dhe veprimet e nipit të tij. Gjithashtu krijohet dyshimi i arsyeshëm se ky shtetas ka rolin e shtytësit në tentativën për të vrarë palët ndërgjyqëse, dyshim i krijuar jo vetëm nga rrethanat e lartpërmendura, por duke marrë parasysh edhe një sërë veprimesh të kryera nga Gjon Shkambi, gjatë periudhës që i paraprin krimit, sikurse janë kërcënimet publike për vrasje të palëve të bëra në emisione televizive, si dhe një numër i madh ngjarjesh të kallëzuara nga viktimat dhe të pasqyruara në sistemin deepsee (të administruara me procesverbal), për kanosjet me jetë që u janë bërë ky person”, thuhet në njoftimin e prokurorisë.
Nën akuzë është edhe roja e sigurisë në Gjykatën e Apelit për “Shpërdorim të detyrës”, pasi ka qëndruar i ulur gjatë ngjarjes dhe nuk ka kryer kontrollin e duhur të të dyshuarve, as regjistrimin e tyre në librin e protokollit.
Ky lëshim i procedurave ka mundësuar hyrjen e autorit në sallën e gjyqit me armë dhe realizimin e vrasjes.
Ngjarja e rëndë ndodhi dy ditë më parë, kur gjyqtari Astrit Kalaja u qëllua për vdekje nga Elvis Shkambi, një palë në një çështje pronësie, pas shpalljes së vendimit në favor të palës tjetër.
Gjatë këtij atentati, dy persona të tjerë, një baba dhe një bir, u plagosën rëndë.
Ngjarja ka tërhequr vëmendjen e të gjithë shoqërisë dhe është dënuar ashpër nga të gjitha nivelet e drejtësisë dhe të institucioneve shtetërore, të cilat e cilësuan aktin si një “sulm brutal ndaj drejtësisë” dhe një “goditje ndaj themeleve të shtetit të së drejtës.”/rtsh.al/
