Xherdan Shaqiri ka përjetuar vetëm momente të mira e suksese që kur u kthye në ligën elite të Zvicrës.
Si kapiten i Baselit, edicionin e kalur fitoi gjithçka në Zvicër, titullin e kampionit dhe Kupën, u bë golashënuesi më i mirë dhe ktheu skuadrën në Ligën e Kampionëve.
Por 33-vjeçari mund të kishte një fat tjetër, po të pranonte ofertat nga klubet e Arabisë Saudite.
Në një intervistë për gazetën Blick, Shaqiri ka pranuar se kishte oferta nga Arabia, por mentaliteti i tij fitues e ktheu në Zvicër për të ndihmuar skuadrën e zemrës.
“Nuk kam dashur të shkoj në Arabinë Saudite, atje ku kisha mundësinë ta shijoja jetën. Për mua, kthimi në Basel ishte një vendim prej zemre, sfida për ta kthyer klubin në nivele të larta, aty ku e meriton të jetë, me mentalitetin tim fitues”, ka thënë Shaqa.
