Që nga 25 shtatori, Shtetet e Bashkuara të Amerikës, janë destinacioni i kryeministrit në detyrë, Albin Kurti.
Në SHBA, Kurti u takua me diplomatë të shteteve evropiane, si dhe me kongresistë amerikanë, si Keith Self, George Latimer e Mike Laëler.
Përgjatë qëndrimit në Amerikë, pjesa dërrmuese e takimeve që Kurti ka zhvilluar kanë qenë me përfaqësues të disa Instituteteve atje dhe me shqiptarë që aktivitetin e shtrijnë në Amerikë.
Deputeti i Vetëvendosjes, Nezir Kraki, vlerëson se këto ishin takime me zyrtarë të rëndësishëm në Amerikë.
“Zoti Kurti është takuar me shumë senatorë, kongresmenë dhe komunitetin shqiptaro – amerikan. Senatorët e kongresmenët janë megjithatë zyrtarë të lartë. Kjo java e Diplomacisë në kuadër të Mbledhjeve të OKB-së, ku shkojnë 140 vende nga e gjithë bota, nuk është se të gjithë shkojnë me ftesa zyrtare të State Departament apo Shtëpisë së Bardhë. Nuk është se të gjithë liderët që gjenden këtë javë në Nju Jork kanë takime tetë a tetë me Donald Trump apo Marco Rubio”, ka thënë Kraki.
Megjithatë, këto takimeve që Kurti i zhvilloi në SHBA, politologu Albionit Maloku, nuk i vlerëson aq lartë.
“Vizita e deputetit Kurti dhe takimet e tija me homologë deputetë, senatorë e kongresmenë, është në vija krejtësisht normale, shto faktin se ai është kryetari i subjektit më të madh politik të dalë nga zgjedhjet e 9 shkurtit dhe vitit rrjedhës”, është shprehur tutje Maloku.
Sipas Malokut, është e pritshme mosrealizimi i takimeve të nivelit të lartë, për shkak se vet vizita e Kurtit në SHBA, nuk ka qenë e paralajmëruar.
“Unë konsideroj që edhe nuk është paralajmëruar se do të ketë diçka të tillë më përpara. Shfrytëzimi i vizitës në SHBA nga ana e zotit Kurti për të shpjegu edhe raportin e tij me situatat aktuale të cilat po ndodhin me Shtetet e Bashkuara të Amerikës dhe Qeverisë në detyrë të Republikës së Kosovës, gjithsesi se është e mirë për arsye se ai po shpjegon percepsionin e tij dhe të vërtetën e tij”, ka përfunduar Maloku.
Krahas Kurtit, në SHBA po qëndrojnë edhe Presidentja Vjosa Osmani dhe ministrja në detyrë e Punëve të Jashtme, Donika Gërvalla.
