Zjarret e rëna prej dy ditësh në ishullin e Sazanit, vijojnë të jenë ende aktive dhe po i afrohen ish-bazës ushtarake, e cila aktualisht shërben për monitorimin e hapësirës detare nëpërmjet radarëve.
Terreni i vështirë dhe pamundësia për të ndërhyrë nga ajri, ka bërë që flakët të vijojnë të djegin çfarë të gjejnë përpara të orientuara nga drejtimi i erës.
Shqetësuese për forcat e zjarrfikësve, ato të ushtrisë dhe policisë, që janë në terren, mbeten plasjet e municioneve të vjetra që janë hedhur ndër vite, ka njoftuar “A2News” të hënën.
Më herët, Ministria e Mbrojtjes tha se situata në Sazan vijon të mbetet kritike, ndërsa shkaku i zjarrit mund të jetë pakujdesia e turistëve.
