Anëtari i LVV-së, Enver Dugolli, është intervistuar sot nga Prokuroria Speciale e Kosovës, pas një padie të ngritur nga Shpend Istogu, djali i ish-oficerit, Ajet Istogu për nxitje të urrejtjes.
Padia kundër tij është ngritur nga pjesëtari i Policisë së Kosovës, Shpend Istogu, i biri i Ajet Istogut.
Dugolli thotë se gjatë viteve ’80 ka qenë viktimë e dhunës fizike, psikike dhe emocionale nga Ajet Istogu dhe se kjo dhunë ka lënë pasoja edhe në shëndetin e tij.
Dugolli ka deklaruar se nuk do të tërhiqet nga fjalët e tij dhe se gjithmonë do të qëndrojë në mbrojtje të së vërtetës, duke theksuar se ka qenë vetë viktimë e dhunës dhe torturave gjatë periudhës së burgosjeve politike.
“Padia është ngritur nga një pjesëtar i Policisë së Kosovës, Shpend Istogu, djali i ish-oficerit famëkeq të UDB-së, Ajet Istogu, i njohur për torturat e rënda ndaj të rinjve, intelektualëve dhe punëtorëve shqiptarë gjatë viteve ’80”, ka shkruar Dugolli, i cili thotë se është i gatshëm të përballet ballëhapur me drejtësinë, duke qenë “i qetë dhe i bindur në të drejtën e tij”, ka shkruar ai në Facebook.
Ai ka kritikuar Prokurorinë Speciale që nuk e ka trajtuar si viktimë dhe dëshmitar të krimeve të rënda të kryera ndaj shqiptarëve nga aparati shtypës i Serbisë.
