Arsim Abazi ka dhënë dorëheqje nga pozita e kryetrajnerit të Ferizajt pas humbjes me rezultat 5:0 nga Prishtina, në ndeshjen e javës së shtatë të elitës së futbollit të Kosovës.
Ferizajasit si vendas pësuan humbjen me të thellë në edicionin e sivjetshëm dhe ishte e pesta rresht, ku ekipi renditet në fund me 6 pikë.
“Faleminderit trajner Arsim Abazi.
FC Ferizaj përmes këtij njoftimi dëshiron të informoj publikun se sot pas ndeshjes kundër Prishtinës, kryetrajneri Abazi dhe stafi i trajnerëve kanë ofruar dorëheqjet e tyre.
Presidenti i klubit Lulzim Abazi dhe drejtori sportiv, Genc Hyseni, në takimin e mbajtur pas zhvillimeve të fundit, e kanë pranuar vendimin e Arsim Abazit dhe stafit, pavarësisht se mbështetja ndaj tyre ishte e palëkundur.
Kësisoj, FC Ferizaj e falenderon kryetrajnerin e deritashëm, Arsim Abazi dhe stafin e tij për kontributin e tyre të çmuar në pankinën tonë.
Me të si trajner, FC Ferizaj arriti të inkuadrohet në Superligë dhe ishim pretendent i fuqishëm për të siguruar një vend në kualifikimet për garat evropiane.
FC Ferizaj i uron shumë shëndet e suksese trajnerit Abazi, duke theksuar se ai do të mbetet përherë pjesë e rëndësishme e historisë së klubit”, njofotn FC Ferizaj.
