Kryetari i Kamenicës dhe kandidati i LVV-së për një mandat të dytë, Kadri Rahimaj, ka prezantuar programin e tij qeverisës, duke theksuar se ai bazohet në gjashtë shtylla kryesore, me arsim, shëndetësi dhe zhvillim ekonomik në qendër të prioriteteve.
Ai ka premtuar ushqim të shëndetshëm për nxënësit nëpërmjet kuzhinës popullore të financuar nga “Shoqata Jetimët e Ballkanit”, si dhe pajisjen e çdo shkolle me tabela të mençura.
Prioritet mbetet arsimi. Për neve mbetet e rëndësishme që politikat e mira tona të zgjerohen. Ushqimi i shëndetshëm në çerdhe do të bëhet i mundur për fëmijët tanë në shkolla fillore dhe të mesme përmes kuzhinës popullore e cila po financohet nga ‘Shoqata Jetimët e Ballkanit’, nga humanisti Halil Kastrati. Ndërsa, secila shkollë do të ketë tabela të mençura…”, deklaroi ai në emisionin “Këndi i Debatit” në Tëvë1.
Në shëndetësi, Rahimaj theksoi se tashmë janë shtuar katër shërbime specialistike dhe premtoi edhe katër të tjera në mandatin e ardhshëm.
“Në shëndetësi kemi shtuar katër shërbime të reja specialistike në mandatin tonë të parë, gjinekologun, pediatrin, radiologun dhe orologun, me të gjitha pajisjet digjitale. Do të shtojmë edhe katër shërbime të reja, punëtorin social, logopedin, psikiatrin dhe fizioterapeutin…”, tha ai.
Në sektorin e bujqësisë, Rahimaj tha se numri i fermerëve është rritur nga 45 në 85 dhe prodhimi i qumështit ka arritur mbi 2 milionë litra.
“Kemi filluar mandatin me 45 fermerë, ndërsa dje është publikuar lista me 85 fermerë. Kamenica sot i prodhon mbi 2 milionë litër qumësht. Fermerët për 20 vite janë përkrahë me 417 mijë euro, ndërsa për katër vitet tona janë përkrahë me 620 mijë euro”
Po ashtu, përmendi organizimin “Kamenica Summer Fest” si një prej sukseseve kulturore dhe konfirmoi se transporti publik, një nga zotimet kryesore, është në fazën përfundimtare të marrëveshjes.
“Në sport e kulturë ne kemi organizimin ‘Kamenica Summer Fest’, një prej sukseseve tona më të mëdha, ku diaspora në mënyrë kuantitative e shpenzon kohen në Kamenicë. Në aspektin e infrastrukturës, zotimi ynë i parë ka qenë transporti publik, veçse kemi punuar në mandatin tonë të parë, që ky zotim të jetësohet. Tashmë jemi në fazën përfundimtare të marrëveshjes”, deklaroi Rahimaj./teve1.info/
