Kryeministri në detyrë, Albin Kurti, ka vizituar varrezat ku janë varrosur vëllezërit Ylli, Agron e Mehmet Bytyqi, të vrarë nga forcat serbe në vitin 1999.
Ai tha se ideali i tyre mbetet udhërrëfyes për brezat e ardhshëm dhe një shembull i lirisë dhe sakrificës për kombin.
“Duke i kujtuar e përkujtuar dëshmorët e kombit, në këtë rast vëllezërit Bytyqi, ne ia përkujtojmë vetes sonë se sa i lartë ishte çmimi që kemi paguar për lirinë që e gëzojmë dhe popullin që kemi, por njëkohësisht edhe ideali i tyre na shërben si udhërrëfyes për të ecur përpara, në mënyrë që të arrijmë atë çfarë ata e kanë dashur e për të cilën janë flijuar. Yllin, Agronin dhe Mehmetin do t’i kujtojmë përgjithmonë dhe brezi ynë ka për detyrë që këtë ta bëjnë edhe brezat pas nesh”, u shpreh Kurti.
Vëllezërit Bytyqi ishin pjesëtarë të Ushtrisë Çlirimtare të Kosovës dhe, pak ditë pas çlirimit, ndërmorën një veprim humanitar për të ndihmuar një familje rome. Gjatë këtij udhëtimi ata u arrestuan nga policia serbe dhe më pas u vranë në një bazë trajnimi, ndërsa trupat e tyre u gjetën në vitin 2001 në një varrezë masive në Serbi.
Dhoma e Përfaqësuesve e Kongresit Amerikan ka miratuar dy rezoluta që kërkojnë veprime konkrete ndaj personave përgjegjës për këtë krim, duke mbështetur drejtësinë ndërkombëtare dhe kërkesën për llogaridhënie nga Serbia.
