Kandidati i Lidhjes Demokratike të Kosovës për kryetar të Gjakovës, Shefqet Shehu, ka shpalosur vizionin e tij për zhvillimin ekonomik të kësaj komune.
Ai tha se programi i tij bazohet në kërkesat e qytetarëve dhe ndërmarrësve lokalë, duke theksuar nevojën për krijimin e një parku biznesi ku do të përfshihen kompani prodhuese, përpunuese dhe të shërbimeve.
Brenda këtij parku, sipas tij, do të themelohet edhe një qendër e teknologjisë me hapësira për start-up-e dhe inkubator biznesi.
“Programi im bazohet në një Gjakovë që e dua e dëshirojë dhe punoj që të jetë e zhvilluar e e qëndrueshme ekonomikisht. Ndërsa, kërkesa ka derivuar pikërisht nga zëri i qytetarëve, ndërmarrësve të Komunës së Gjakovës dhe në të gjitha rastet kemi kuptuar që aty është e domosdoshme ndërtimi dhe krijimi i një hapësire të një parku të biznesit me ç’rast do të jetë një përparësi, ku brenda saj do të jenë kompanitë prodhuese, përpunuese, kompanitë e shërbimeve me theks të veçantë do të themelohet edhe qendra e teknologjisë, duke iu bashkuar me një okupator biznesi dhe hapësira të mjaftueshme për start-up-e. Në mënyrë që të gjitha të jenë të ndërlidhura me njëra-tjetrën, do ta bëjmë Gjakovën tepër konkurrente me një qendër më të vërtetë kampion në Dukagjin”, deklaroi ai në emisionin “Info Nata” në Tëvë1.
Ai shtoi se projekti i hekurudhës do të ofrojë lehtësira të mëdha për lëvizjen e mallrave dhe qytetarëve, ndërsa paralajmëroi se në një të ardhme të afërt Gjakova do të ketë edhe aeroportin e saj, që do t’i shërbejë transportit të njerëzve dhe tregtisë.
“Përparësi tjetër është që projekti për hekurudhën do të krijojë një lehtësi të jashtëzakonshme për lëvizjen e mallrave dhe të njerëzve, po ashtu duhet theksuar që Gjakova në një ardhme të caktuar do të ketë edhe aeroportin e saj, në shërbim të lëvizjes së njerëzve dhe mallrave”, deklaroi Shehu.
