Avokati Azem Vllasi ka deklaruar se mënyra se si po funksionon Kuvendi i Kosovës, e bën të vështirë formimin e një qeverie të re dhe se vendi rrezikon të shkojë drejt zgjedhjeve të parakohshme.
Ai tha se deputetët nuk po arrijnë marrëveshje politike dhe po humbasin kohë që për pasojë po sjell kriza.
“Qysh është duke vepruar Parlamenti jonë, zor që do të ketë qeveri të re, do të shkohet në zgjedhje të reja. Këta po na humbin kohë. Unë bëj thirrje që lista e partive të jetë e gjerë, dhe qytetarët të mos i votojnë ata deputet të cilët kanë sjell probleme në Kuvend”, tha Vllasi në emisionin “Mesditë” në Tëvë1.
Ai paralajmëroi se pas 30 shtatorit kriza politike do të thellohet edhe më shumë, duke shtuar se Kuvendi mund të përballet me probleme serioze gjatë procesit të votimit të qeverisë.
“Deputetët do ta vazhdojnë krizën edhe pas datës 30 shtator. Do të vazhdojnë dyshimet se a është kryetar i duhur ky që është zgjedh apo duhet me largu. Kur të jenë në fazën për ta votuar qeverinë aty ka me pas problem edhe më shumë. E kemi një udhëheqësi në Parlament, i cili prodhon krizë të vetën. Kjo krizë është për shoqërinë”, theksoi ai./teve1.info/
