Publicisti, Kim Mehmeti e ka cilësuar njohjen e Palestinës nga disa shtete evropiane, si një tentativë për të shpërlarë ndërgjegjen e tyre pas dy vitesh heshtje ndaj veprimeve të Izraelit në Gaza.
Mehmeti e quajti këtë një akt dyfytyrësie pasi, sipas tij, ato fillimisht mbështetën Izraelin në të drejtën e tij për t’u mbrojtur, ndërsa tani, pas dy vitesh, po përpiqen të rregullojnë gabimin e tyre duke e njohur Palestinën.
Sipas tij, këto shtete i dhanë kohë Izraelit ta shndërrojë Gazën në një vend të pabanueshëm, duke vrarë fëmijë palestinezë dhe shkatërruar infrastrukturën e saj.
“Njohja e disa shteteve tani është një tentativë për t’a shpëlarë veten, sepse ata shkuan menjëherë në Tel Aviv për ta përkrahur Izraelin në të drejtën e tij për t’u mbrojtur, duke vrarë fëmijë palestinezë. Ata e shihnin se çfarë bënte Izraeli atje dhe heshtnin. Dy vite kanë heshtur, dhe tani e njohin, do ta njohin Palestinën pasi nuk do të ketë asnjë palestinez të mbetur që të ndërtojë atë shtet. Prandaj kjo është dyfytyrësi se nga njëra anë thonë se do ta mbështesin Izraelin që të mbrohet, edhe pse po vret fëmijë dhe po shkatërron gjithçka, nga ana tjetër, tani e njohin Palestinën. Ata i dhanë kohë Izraelit që ta bëjë Gazën të pabanueshme për njerëzit, sepse aty nuk mund të jetohet më, nuk ka mbetur asgjë, çdo gjë është rrënojë. Dhe tani e njohin. Edhe kjo është mirë, që iu kujtua pas dy vitesh, pasi panë që Gaza është shkatërruar, pasi panë që atje vriten fëmijë të pafajshëm si zogj. Ata kuptuan se po bënin një gabim dhe tani po përpiqen ta rregullojnë. Dhe thanë çfarë të bëjmë? Hajde ta njohim”, ka thënë ai në emisionin “Këndi i Debatit” në Tëvë1.
