Ish-drejtori i Policisë së Kosovës, Reshat Maliqi, në emisionin “Ditari” në Tëvë1 ka folur për sulmin terrorist në Banjskë, ku sot shënohen dy vjet nga ngjarja e rëndë e udhëhequr nga Millan Radoiçiq dhe grupi i tij.
Nga ky sulm mbeti i plagosur polici Alban Rashiti dhe u lëndua edhe një pjesëtar tjetër i Policisë së Kosovës.
Maliqi tha se rasti ka qenë mjaft i komplikuar, pasi akterët kryesorë kanë arritur të arratisen nga territori i Kosovës.
“Ka qenë një rast i rëndë, mjaft i komplikuar. Akterët kryesor kanë mundur që të arratisen prej vendit, prej territorit të Kosovës, siç shihet në video kur ata shfrytëzojnë një pjesë për ikje. Hetimi ka qenë mjaft i rëndë dhe i komplikuar. Është dashur gati një vit të punohet intenzivisht që të grumbullohen informacione dhe dëshmi të mjaftueshme që të ngritet aktakuzë ndaj këtyre personave. Unë mendoj që ende ky rast ka nevojë të hetohet dhe të grumbullohen informacione të reja. Në momentin që do të arrestohen akterët kryesorë, atëherë do të dihet shumë më tepër për këtë rast”, ka deklaruar Maliqi.
Ai theksoi edhe rrezikun që paraqisnin armët e gjetura në vendin e ngjarjes.
“Një numër i madh armësh që janë gjetur në atë vend përdoren vetëm për operacione të veçanta, për operacione terroriste. Po të ishin përdorur ato armë, pasojat do të ishin jashtëzakonisht të mëdha. Por reagimi i shpejtë i Policisë, në vendin ku i kanë ndalur dy kamionë, dhe vdekja heroike e heroit tonë Afrimit, kanë arritur të evitojnë atë pasojë dhe ta parandalojnë një të keqe që do të ishte edhe më e madhe, ku pasojat do të ndiheshin edhe sot”, ka shtuar Maliqi.
