Është viti i dytë që 24 shtatori i gjen krerët e shtetit, figura të partive politike dhe qytetarë të shumtë në varrezat e fshatit Samadrexhë të Vushtrrisë.
Të gjithë njëzëri bëhen bashkë për të nderuar heroin Afrim Bunjaku, i cili u vra më 24 shtator të vitit 2023 në Banjskë të Zveçanit nga një grup serbësh të armatosur gjatë një sulmi kundër Policisë së Kosovës.
Dashamirët që erdhën për të nderuar heroizmin e Afrim Bunjakut, i priti edhe djali i tij i vogël.
Por, ai nuk mund t’i mbante lotët pranë varrit ku prehet i ati.
E këtë të fundit e nderuan edhe krerët e shtetit.
Pas homazheve, i pari që foli ishte kryetari i Kuvendit, Dimal Basha.
E kryeministri në detyrë, Albin Kurti, ka thënë se rënia heroike e Afrim Bunjakut ngriti Republikën e Kosovës, me ç’rast i ka bërë thirrje faktorit ndërkombëtar që të mos e konsiderojë Serbinë “shtet normal”, përderisa nuk i dorëzon pjesëtarët e grupit terrorist që kreu sulmin në Banjskë të Zveçanit dy vjet më parë.
“I bëj thirrje faktorit ndërkombëtar që të mos e konsiderojë Serbinë shtet normal, derisa nuk i dorëzon kriminelët e udhëhequr nga Milan Radojçiq dhe të mbështetur nga presidenti i Serbisë, Aleksandër Vuçiq. Këta duhet t’i dorëzohen Kosovës”, ka thënë Kurti pas homazheve të bëra te varri i heroit Afrim Bunjaku në dyvjetorin e vrasjes së tij në Banjskë.
Për ta nderuar heroizmin e Bunjakut, homazhe bënë edhe ministri i Punëve të Brendshme në detyrë, Xhelal Sveçla, dhe drejtori i përgjithshëm i Policisë, Gazmend Hoxha.
Drejtori i Policisë tha se nëse Serbia tenton sërish të kryejë akte të tilla, do t’i kundërpërgjigjen sërish.
Homazhe për heroin Afrim Bunjaku bënë edhe liderë të partive politike dhe ambasadorët e akredituar në Kosovë.
Në vendin ku ra heroikisht heroi, emri i tij u përjetësua në rrugën “Afrim Bunjaku”.
