Autori: Jona Kelmendi
E mbështetur nga të afërmit me emocionet që ia lexon në fytyrë.
Badishahe Islami ndalet me emocion para pllakës së sapo zbuluar këtë të martë në Prishtinë, në rrugën “Dëshmorët e Kombit”.
Pllakë kjo kushtuar civilëve shqiptarë të pushkatuar nga ish-forcat komuniste jugosllave në pesëvjeçarin e parë pas Luftës së Dytë Botërore.
E për Badishahe Islami, daja i saj, Shyqri Begu, ishte më shumë se një familjar ishte një patriot dhe humanist i madh.
“Daja im ka qenë kryetar i …. për Shqipërinë etnike më këta të tjerët krejt bashkë kanë luftu ka qenë një patriot i madhë. Ka qenë një njeri human, Shyqri Begu ka pas një ndër fabrikat e para në Kosovë me rrymë edhe ka punu vazhdimisht për Shqipërinë etnike edhe në lidhjen e dytë të Prizrenit ka marrë pjesë”, ka thënë Islami.
Ndërsa edhe mbesa e tij, Flutura Palloshi, kujtoi se dhimbja e tragjedisë është trashëguar brez pas brezi.
“Nëna nuk është në jetë por na e ka përcjell më shumë dhimbje momentin e tragjedisë që e kan vra gjyshin jemi krenar që jemi pasardhës të Shykri Begut. Kjo do të thotë shumë për ne mjafton që e kanë shenu çdo herë e kemi pas në kujtim kemi mendu diçka të tillë faleminderit kryetarit të Komunës që e mundësoi me të vërtetë pllakë e vogël por për ne do të thotë shumë”, është shprehur Palloshi.
E i pranishëm në këtë ceremoni ishte edhe Kryetari i Komunës së Prishtinës, Përparim Rama, i cili tha se kjo pllakë ka ardhur me vonesë, por do të mbetet si një kujtesë e fortë se liria nuk është dhuratë, por amanet.
“E dimë se kjo pllakë përkujtimore këtu është vonuar pra duhej të ishte vendosur këtu dekada me parë dhe e di mirë që ajo edhe sot që po e shpalosim nuk ka me i mbyll plagët, nuk ka më i kthye gjyshër e prind e vëllezër nuk ka me na tregu varret që ende nuk dihen por ka me bo një gjë të madhe ka me i dhanë zë kësaj toke që flet ka me lidh të kaluarën me të tashmen që kur të ndalemi pran saj të kujtojmë që liria nuk është dhuratë por liria është amanet”, ka thënë Rama.
Kjo pllakë është vendosur në Taukbahçe, në vendin ku u ekzekutuan pa gjyq shumë patriotë shqiptarë, mes tyre edhe Gjon Serreçi, Ukë Sadiku, Ajet Gërguri e Osman Bunjaku.
