Personalitete politike, aktorë, e figura publike kanë bërë sot homazhe pranë arkivolit te aktorit të njohur, Enver Petrovci, në Teatrin Kombëtarë të Kosovës.
Të pranishëm ishin edhe kryetari i Lidhjes Demokratike të Kosovës Lumir Abdixhiku dhe kryetari i kryeqytetit, Përparim Rama.
Lumir Abdixhiku e nderoi jetën dhe kontributin e Petrovcit, duke theksuar se ai ishte një ikonë e artit dhe teatrit kosovar, si dhe një profesionist i jashtëzakonshëm që do të kujtohet përherë.
“Ishte një ikonë e vërtetë e artit, teatrit dhe të kulturës së Kosovës. Ishte ndër të parët prej artistëve, ligjëruesve dhe njerëzve që lanë shenja mbi kohë. Ai do të kujtohet përherë si një profesionist i jashtëzakonshëm.. Sot i shprehëm ngushëllime familjes, komunitetit dhe zërit artistik, do të kujtohet përherë”, tha Abdixhiku.
Edhe kryetari i Prishtinës, Përparim Rama shprehi ngushëllimet e tij për familjen Petrovci dhe komunitetin artistik.
Rama tha se Petrovci ka qenë gjithmonë një frymëzim për brezat e rinjë, sidomos ata të komunitetit të artit e kulturës.
“Ishim sot për homazhe të mjeshtrit të madh të ekranit dhe të teatrit, Enver Petrovcin, i cili ka qenë gjithmonë frymëzim për brezat e rinjë, për të gjithë pjesëtarët e komunitetit të artit dhe kulturës, talent i pashoq, dikënd që do ta kujtojmë si njëri që ka lënë vlera të pashlyera në shoqërinë tonë. Ngushëllime gjithë komunitetit, kryeqyteti dhe gjithë Kosovës”, ka thënë Rama.
Në moshën 71 vjeçare u shua ikona e teatrit e filmit Enver Petrovci.
I pranishëm ishte edhe kryetari i Kuvendit të Kosovës, Dimal Basha dhe nënkryetarja Albulena Haxhiu, të cilët nuk u prononcuan për media.
