Kapiteni Granit Xhaka është i bindur se Sunderlandi është në rrugën e duhur për të arritur gjëra të mëdha këtë sezon në Premier League.
Xhaka ka vazhduar të jetë lider i Sunderlandit edhe në ndeshjen e fundit, duke treguar paraqitje që është vlerësuar nga të gjithë.
Sunderlandi barazoi 1:1 në shtëpi kundër Aston Villas, ndërsa Xhaka asistoi në golin e ekipit të tij që u shënua në minutën e 75-të kurse në fund të ndeshjes u ndëshkua me karton të verdhë.
“Edhe pse kartoni i kuq ndryshoi planet tona, kam besuar se një pikë është më shumë se e merituar në këtë përballje. Mentaliteti i ekipit tonë na bën kundërshtar të vështirë për çdo skuadër, ndërsa përkrahja që e marrim nga tifozët është madhështore. Tifozët besojnë në këtë ekip dhe kjo është e rëndësishme pasi mund të arrijmë gjëra të mëdha”, ka thënë Xhaka.
Pas pesë xhirove në Premier League, Sunderlandi ka tubuar 8 pikë dhe zë vendin e shtatë në tabelë kurse Xhaka që iu bashkua ekipit para fillimit të sezonit, ka 2 asistime në 5 ndeshje kampionale.
