Ousmane Dembele i Paris Saint-Germainit, po shihet favorit para superyllit të Barcelonës, Lamine Yamal në garën për ta fituar “Topin e Artë” për këtë vit.
Ceremonia e ndarjes së çmimit kryesor individual në futboll, mbahet sot në Paris dhe fillon në orën 20:00.
Elita e botës së futbollit, do të mblidhet në qendër të Parisit për të zbuluar se kush do të jetë fitues i çmimit që për shumë vjet u dominua nga dyshja Lionel Messi dhe Cristiano Ronaldo.
Prej vitit 2008 deri në vitin 2023, Messi dhe Ronaldo e kanë fituar 13 herë “Topin e Artë”, dominim të cilit i dha fund vitin e shkuar mesfushori i Manchester Cityt, Rodri.
Dembele është favoriti kryesor nga lista e nominuarve, e cila dominohet nga lojtarët e PSG-së, ekip që sezonin e shkuar triumfoi në Ligën e Kampionëve, si dhe dominoi plotësisht në Francë.
Sa i përket futbollisteve, çmimi prestigjioz pritet t’i jepet Aitana Bonmatit për herën e tretë rresht.
“Topi i Artë”, tani ndahet për të arriturat e sezonit të fundit, në këtë rast atij 2024/2025, dhe jo si më parë kur votohej për sukseset në një vit kalendarik.
