Prokuroria Themelore në Mitrovicë, në bashkëpunim me Policinë e Kosovës, ka zhvilluar një aksion në Vushtrri, duke kontrolluar tri lokacione, dy në fshatin Ropicë dhe një në qytetin e Vushtrrisë.
Siç bëhet e ditur në njoftim nga ky operacion policor janë arrestuar tre persona të dyshuar për veprën penale “detyrimi”, si dhe një tjetër që ishte në arrati për veprat “lëndim i lehtë trupor” dhe “arratisja e personave të privuar nga liria”.
Me vendim të prokurorit, të katër të ndaluarit janë dërguar në mbajtje për 48 orë, ndërkohë që operacioni po vazhdon.
“Prokuroria Themelore në Mitrovicë në koordinim me Policinë e Kosovës, respektivisht Drejtorinë për Hetimin e Krimit të Organizuar dhe Krimeve të Rënda, ka bërë realizimin e urdhëresës së Gjykatës Themelore në Mitrovicë – dega Vushtrri për kontrollin e shtëpive të katër (4) personave të dyshuar, ku që nga orët e hershme të mëngjesit janë kontrolluar gjithsej tri (3) lokacione, dy (2) në fshatin Ropicë të Vushtrrisë dhe një (1) lokacioni në qytetin e Vushtrrisë. Nga ky operacion policor janë arrestuar tre (3) persona lidhur me dyshimin e kryerjes së veprës penale “Detyrimi”, si dhe një (1) person i cili ka qenë në arrati për veprat penale “Lëndimi i lehtë trupor“ dhe “Arratisja e personave të privuar nga liria“. Me vendim të prokurorit, katër (4) të pandehurit ndalohen për 48 orë, ndërkaq operacioni është duke vazhduar”, thuhet në njoftim.
