Në rendin e parë të pjesëmarrëseve u ulë nëna e heroit të kombit, Afrim Zhitia, Qamilja.
Me emocione e përcjell zbulimin e shtatores në fshatin Llugë të Podujevës për të birin, teksa ndihet krenare për heroin që la gjurmë të mëdha në shtetin e Kosovës.
“Shumë mirë u kon jena ndi shumë mirë, ai ështe shku po une e di për çka është shku e per qata nihna mirë e nihna e fort e ideali i tij man gjallë se u shku per popull të vet e lavdi ju koftë krejt heronjve Afrimit e krejtve”, tha Qamile Zhitia.
Në këtë ceremoni solemne morën pjesë bashkëluftëtarë të të ndjerit, familjarë dhe përfaqësues të shtetit.
Figura e tij, e mbështjellë me të kuqe deri në momentin e zbulimit, u vendos përballë obeliskut monumental, duke sjellë në kujtesë jetën dhe sakrificën e tij në mbrojtje të atdheut.
Motra e heroit, Sadete Zhitia, e cilëson rikthimin e tij në Llugë si një fitore pas betejave të vështira.
“U deshtë një udhëtim i gjatë shumë i gjatë që Afrimi të kthehej këtu në shtëpinë e tij në vendin ku nisi rrugëtimi i tij për liri ky kthim pikërisht tani duket si një rikthim fitimtar pas betejave të vështira, historia duket se e ka lidhur ardhjen e tij me bashkimin e Mitrovicës me shtrirjen e ligjit në tërë territorin e Kosovës”, tha motra e Afrimit, Sadete Zhitia.
E Kryeministri në detyrë Albin Kurti tha se me shtatoren po shtohet një vepër monumentale përkujtimi për Afrim Zhitinë.
“Jemi bashkuar këtu në fshatin Llugë në vendlindjen e Afrim Zhitisë për të inauguruar një formë tjetër të përkujtimit të figurës së Afrim Zhitisë dhe veprës së tij, obeliskut të përtrirë këtu sot po i shtohet edhe një skulptur sikur një vepër monumentale publike e komomerimit të Afrim Zhitisë djalit të Llapit dhe heroit të Kombit. Dikush i ka ruajtur kujtimet për Afrimin e dikush i ka ruajtur letrat e fotografitë e Afrimit diku janë ruajtur rrëfimet për rezistencën e Afrimit dhe Fahriut në Brehg të Diellit e diku janë shkruar e mësuar idealet dhe frymëzimet e tyre politike”, deklaroi Kurti.
Edhe ish-kryeministri Ramush Haradinaj njëherit ish komandanti i Zonës Operative të Dukagjinit, theksoi se rezistenca e Afrim Zhitisë përshpejtoi zhvillimet që pasuan në Prekaz.
“Ky akt i tij edhe i rezistencës në një kohë të hershme në vitin 1989 e ka përshpejtu në një mënyrë apo në një tjetër atë që ndodhi në Prekaz më vonë”, tha Haradinaj.
Ideatori i obeliskut, Ismet Sylejmani, e quajti vendosjen e shtatores ngjarje të madhe historike.
“Vendosja e shtatores së heroit të kombit Afrim Zhitia është edhe do të mbetet ngjarje e madhe historike kombëtare sot e përgjithmonë do të qendrojë në bronz këtu pranë obelesikut gjigant udhëheqësi i madh Afrim Zhitia”, tha Sylejmani.
E një fjalë rasti e tha edhe Kryetari i Podujevës, Shpejtim Bulliqi. Ai u shpreh se shtatorja është pasqyrim i shpirtit dhe guximit të heroit.
“Shtatorja e Afrim Zhitis është më shumë se një monument ajo është një pasqyrim i shpirtit i guximit dhe i vullnetit, njeriut që jetën ia kushtoi liris dhe atdheut”, tha Bulliqi.
Shtatorja u punua nga artisti llapjan Alban Blakçori.
Me 2 nëntor 1989 në lagjjen Bregu i Diellit ne Prishtinë u rrethohen nga forcat serbe, Afrim Zhitia dhe Fahri Fazliu. Pas një luftimi 10-orësh ra heroikisht Afrimi së bashku me Fahri Fazliun.
