Dogana e Kosovës, përmes zyrës doganore në Prishtinë, ka zbuluar dhe ndaluar një ngarkesë importi që përmbante 16,350 aksesorë për celularë, të dyshuar se shkelin të drejtat e pronësisë intelektuale të markës Apple.
Sipas njoftimit të Doganës, ky rezultat u arrit “falë analizës së riskut dhe vigjilencës së zyrtarëve doganorë”.
“Zyrtarët doganorë kanë parandaluar që këto produkte të dyshuara si pirate të hyjnë në treg dhe të dëmtojnë konsumatorët”, thuhet në njoftim.
Dogana e Kosovës thekson se mbetet e vendosur në luftën kundër produkteve ilegale dhe në mbrojtje të tregut të ligjshëm.
“Dogana e Kosovës mbetet e vendosur të luftojë dhe të parandalojë dukuritë negative, të mbrojë shoqërinë dhe të sigurojë një treg të drejtë për bizneset e ndershme”, njofton institucioni.
