Hetuesit policorë nga Drejtoria për Hetimin e Trafikimit me Narkotikë, Njësia në Prishtinë, kanë ndaluar dy persona të dyshuar për trafikim me lëndë narkotike gjatë një aksioni operativ të zhvilluar më 18 shtator.
Sipas Policisë, gjatë kontrollit të automjetit ku po udhëtonin të dyshuarit, tek njëri prej tyre është gjetur substancë që dyshohet të jetë kokainë me peshë 0.6 gram dhe marihuanë me peshë 3.5 gramë.
“Gjatë realizimit të planit, një i dyshuar tjetër me veturë, me të vërejtur policinë, e ka braktisur veturën dhe ka arritur të ikë. I dyshuari në tokë ka hedhur një qese me substancë që dyshohet të jetë marihuanë me peshë 41.8 gramë. Në veturë janë gjetur dhe konfiskuar si prova materiale edhe 180 euro dhe një telefon”, thuhet në raport.
Në lidhje me rastin, prokurori ka urdhëruar kontrollin e banesave të të dyshuarve, ku janë gjetur dhe konfiskuar substanca të tjera narkotike dhe pajisje për prodhim.
“Në banesën e njërit të dyshuar janë gjetur pesë qese me marihuanë me peshë 545.6 gramë, një peshore dhe dëshmi tjera relevante, ndërsa në banesën e të dyshuarit tjetër janë sekuestruar 9.2 gramë marihuanë, 15 kuti plastike me kërpudha narkotike dhe 179 kavanozë me fara në fazën e prodhimit”, njofton Policia.
Me aktvendim të prokurorit, i dyshuari L.A., mashkull kosovar, është dërguar në mbajtje për 48 orë, ndërsa hetimet ndaj personit tjetër vazhdojnë.
