Rivitalizim të plotë të Kurrizit dhe hapësirës rreth Santesë, rinovim të të gjitha ndërtesave me fasada të reja, izolim dhe panele solare, riparim të të gjithë ashensorëve ekzistues në lagje, ndërtim të dy parkingjeve nëntokësore për të liruar hapësirat publike para ndërtesave, krijim të një qendre multifunksionale të lagjes me pishinë gjysmë-olimpike, si dhe hapësira rekreative janë disa nga zotimet e kandidatit të PDK-së për kryetar të Prishtinës, Uran Ismaili për lagjen “Dardania” të kryeqytetit.
Ismaili ka theksuar se këto projekte do ta kthejnë Dardaninë në një lagje më funksionale, me hapësira moderne dhe të mirëmbajtura, ku qytetarët do të ndihen pjesë e një jete urbane më të gjallë dhe cilësore.
“Dardania ka nevojë për jetë më të mirë në lagje, jo për hapësira pa gjallëri e pa mirëmbajtje”, ka thënë ai në një video të postuar në rrjetin social Facebook.
