Në vijim të dëshmisë në Hagë, James Rubin, të martën tregoi arsyet pse ai ka refuzuar të jetë dëshmitar i Prokurorisë në rastin gjyqësor ndaj Hashim Thaçit dhe të tjerëve, duke thënë se kjo ka të bëjë me pikëpamjet e tij për Gjykatën Speciale.
Ish-zyrtari i lartë amerikan e quajti “të padrejtë” mbajtjen për pesë vjet në paraburgim të të akuzuarve, të cilët, sipas tij, u dorëzuan vullnetarisht.
E, avokati, Anton Nrecaj i ka vlerësuar si të duhura kritikat e Rubinit, duke theksuar se ato pasqyrojnë më së miri anshmërinë e Speciales ndaj ish-krerëve të të Ushtrisë Çlirimtare të Kosovës (UÇK).
“Natyrisht se kritika vjen nga këndvështrimi i tij individual është shumë gjë e mirë pasi shpërfaq anshmërinë e Gjykatës Speciale kundrejt ish-krerëve të UÇK-së. Ashpërsia e kësaj gjykate dhe arsyetimi që nëse lirohen ata dhe vazhdon procesi i tyre mbrojtje për liri mund të rrezikojë potencialisht procesin gjyqësor apo mund të kërcënojnë dëshmitarët e të tjera vërtetë është i papranueshëm. Vetë kritika e Rubin ka qenë normalisht e fokusuar në këtë pjesë sepse në një situatë normale në një gjykatë e cila vërtetë do të duhej të gjykonte drejtë dhe paanshëm do të duhej të veprohej kështu..”, ka thënë Nrecaj në emisionin “Ditari” në Tëvë1.
