David Alaba pritet të largohet nga Real Madridi në verën e vitit 2026, kur i skadon kontrata me klubin.
Alaba prej kohësh nuk po gjen vazhdimësi për shkak të dëmtimeve dhe konkurrencës në repartin defensiv.
Që prej ardhjes së tij në Madrid në vitin 2021, Alaba ka pasur momente të mira, por forma e tij është zbehur vitet e fundit.
Mediat turke raportojnë se Fenerbahçe është shumë i interesuar për të nënshkruar me Alabën.
Klubi nga Stambolli kërkon përvojë dhe lidership në mbrojtje dhe i ka ofruar austriakut një rol të rëndësishëm në skuadër.
Për Real Madridin, largimi i Alabës nuk do të jetë një problem, pasi klubi është i fokusuar në rinovimin e repartit të mbrojtjes me lojtarë më të rinj. Nga ana tjetër, edhe vetë lojtari duket i vetëdijshëm se aventura e tij në ‘Bernabeu’ po mbyllet.
Në moshën 33-vjeçare, Alaba mund të nisë një kapitull të ri jashtë La Ligës, me Turqinë si destinacionin më të mundshëm.
Fenerbahçe po përgatit një ofertë konkrete dhe verën e ardhshme mund të kompletojë transferimin.
