Kandidati i Lëvizjes Vetëvendosje për kryetar të Prishtinës, Hajrulla Çeku, ka nisur fushatën për zgjedhjet lokale të 12 tetorit, duke premtuar qeverisje të ndershme dhe transparencë të plotë në çdo vendim të marrë.
Në fjalimin e tij, Çeku kritikoi ashpër pushtetin e deritashëm, duke folur për keqpërdorim të parasë publike, nepotizëm dhe klientelizëm.
“Çfarë kemi parë deri tash: keqpërdorim të parasë publike, nepotizëm, klientelizëm, një qeverisje që merret me fasadë dhe injoron qytetarin. Prishtina nuk është fasadë, është përmbajtje, përgjegjësi, shërbim ndaj qytetarit. Kjo është arsyeja pse jemi këtu. Drejtimi ynë ka një emër: quhet Prishtina 2035. Një plan i qartë, jo një premtim i zbrazët. Ndërtohet mbi tri shtylla të forta: një qytet që funksionon, një kryeqytet që zhvillohet dhe një qytet që garanton barazi”, tha ai.
Çeku theksoi se qeverisja e tij do të bazohet në llogaridhënie dhe shërbim ndaj qytetarëve.
Kandidati i Vetëvendosjes prezantoi edhe pesë zotimet kryesore të programit të tij: lagje të pastra dhe funksionale, zhvillim të ekonomive familjare, park industrial, rinovim të Pallatit të Rinisë dhe rifunksionalizim të Grantit.
