Zëvendësministri i Drejtësisë, Vigan Qorrolli ka reaguar ndaj shkrimit të publicistit Ben Blushi, i cili pas vendimit të ShBA-së për pezullimin e dialogut strategjik e quajti Albin Kurtin “korb” dhe krijoi metaforën e “albinsektit”.
Në një shkrim të gjatë, Qorrolli e ka cilësuar fjalorin e Blushit si “zoologji, e jo analizë politike”, duke theksuar se Kosova nuk është as kopsht insektesh, as fermë korbash, por një vend që ka derdhur gjak për lirinë e vet.
“Ju mund të shpikni fjalë si ‘albinsekt’, të pikturoni sqepa e kthetra, por kjo nuk është analizë politike. Është thjesht mëria e një shkrimtari të lodhur që nuk ka më lexues, ndaj shpik armiq imagjinarë”, shkruan ai.
Qorrolli renditi disa arritje të qeverisjes së Kurtit, duke përmendur uljen e korrupsionit sistemik, mbylljen e “derës për oligarkët”, rritjen e të hyrave në dogana e tatime, si dhe subvencionet për fshatarët e thjeshtë.
“Ju thoni se Kosova ‘është në konflikt me Amerikën’, por e dini mirë se trupat amerikane janë këtu më të pranishme se kurrë. Ju thoni se ‘është në depresion’, por harroni se klientelizmi dhe plaçkitja e miqve tuaj e futi këtë vend në depresion, e jo një qeveri që guxoi të prekë të paprekshmit”, thekson Qorrolli.
Ai i është kundërpërgjigjur edhe krahasimit të Blushit mes Kurtit dhe Enver Hoxhës: “Ky është kulmi i cinizmit: të krahasosh një lider të zgjedhur me një tiran që e mbylli Shqipërinë me tela me gjemba. Krahasimi juaj është i shëmtuar, njësoj si fletrrufetë e diktaturës që ju sot, paradoksalisht, po i imitoni”.
Sipas tij, arsyeja pse Albin Kurti konsiderohet i ndershëm është e qartë:
“Sepse nuk bleu asnjë vilë. Sepse nuk bleu asnjë media. Sepse nuk bleu asnjë gazetar që t’i shkruajë himne. Sepse nuk bleu asnjë shkrimtar të dështuar për t’i bërë fletushka. Ndershmëria nuk është të mos marrësh një laps. Ndershmëria është të mos ia marrësh një populli shpresën”.
Në fund, Qorrolli i drejtohet Blushit: “Prandaj, Ben, kur të shkruash përralla me insekte, mos i servirni si analiza. Shkruani romane, aty ku e keni vendin, nëse ju ka mbetur ende ndonjë lexues”.
Shkrimtari Ben Blushi ka deklaruar se me vendimin e pezullimit të dialogut Amerika e ka shpallur Albin Kurtin de fakto non grata. Sipas tij, marrëdhëniet e Kosovës me Amerikën janë në pikën më të ulët.
