Në njoftim thuhet se mbi 24 mijë nxënës nesër do ti nënshtrohen këtij testi i cili do të mbahet në 176 qendra të testimit.
Kurse pjesa e dytë e testit të arritshmërisë pritet të mbahet më 14 qershor.
“Mbi 24 mijë nxënës të klasëve të nënta nesër do ti nënshtrohen pjesës së parë të Testit të Arritshmërisë, i cili do të mbahet në 176 Qendra të Testimit, ku të angazhuar për mbarëvajtje të këtij procesi janë rreth 1600 administrues. Pjesa e dytë e Testit do të mbahet më 14 qershor dhe nxënësit do të kenë mundësi që gjatë dy ditëve të përgjigjen në 200 pyetje, 4 lëndë në ditën e parë dhe 5 lëndë në ditën e dytë të testimit”, thuhet në njoftim.
Bëhet e ditur se ministrja Nagavci ka theksuar se këtë vit do të ulet përqindja e pikëve për kalueshmëri të testit për nxënësit e shkollave të mesme.
Kjo sipas saj me qëllim të vetëm, që nxënësit të mos penalizohen për punën që kanë bërë për nëntë vite.
“Duke rikujtuar se nxënësit e kësaj gjenerate janë përballuar me vështirësitë e krijuara nga pandemia Covid-19, ministrja Nagavci tha se ata do të kenë në dispozicion 2 orë për tu përgjigjur në pyetjet e parashtruara, për të cilat edhe shprehu bindjen se do të jenë në përputhje me atë çfarë kanë mësuar gjatë shkollimit. Sa i përket uljes së përqindjes së pikëve për regjistrim në shkolla të mesme të larta, nga 60 në 40 përqind, ministrja Nagavci theksoi se, qëllimi i vetëm ka qenë që nxënësit të mos penalizohen për punën që kanë bërë për nëntë vite, vetëm sepse gjatë ditës së testimit kanë mund të mos japin maksimumin”, thuhet tutje.
Nagavci u ka uruar sukses të gjithë nxënësve teksa ka kërkuar nga DKA-të respektim të plotë të rregullave të caktuara.
