Dogana e Kosovës ka njoftuar se gjatë kontrollit rutinor dhe mbikëqyrjes së mallrave që hyjnë në territorin e Republikës së Kosovës, ka identifikuar një rast të mosdeklarimit të saktë të origjinës së produktit gjatë procedurave të importit në pikën doganore në Vërmicë.
Sipas njoftimit, gjatë zhdoganimit të një ngarkese me shufra çeliku e deklaruar me origjinë nga një shtet anëtar i Bashkimit Evropian është konstatuar se në etiketat dhe mbishkrimet e produktit figuronin shtete tjera si vende origjine, konkretisht Algjeria dhe Turqia.
Ndërkaq, pas verifikimit të plotë, thuhet se është konstatuar se produktet bartnin etiketa të qarta me shënime të origjinës nga vendet e lartpërmendura, si dhe mbishkrime të tjera identifikuese që lidhen me prodhues të atyre vendeve.
“Mosdeklarimi i saktë i origjinës së mallit përbën shkelje të dispozitave ligjore në fuqi dhe mund të rezultojë në shmangie nga pagesa e plotë e detyrimeve doganore. Si rrjedhojë, ndaj palës është iniciuar procedurë kundërvajtëse në përputhje me nenin 244 të Kodit Doganor dhe Akcizës së Republikës së Kosovës”, theksohet në njoftim.
