Asociacioni i Gazetarëve të Kosovës (AGK) ka reaguar pas postimit të presidentes Vjosa Osmani në rrjetet sociale, duke e cilësuar atë si një sulm të ri ndaj gazetarëve dhe mediave.
Në një postim të gjatë në Facebook, Osmani shkruante për “përndjekjen e vazhdueshme, të kundërligjshme e të rrezikshme që media të caktuara u bëjnë vajzave të mia të mitura”. AGK-ja thekson se raportimi për shkollimin e vajzave të presidentes, qoftë në shkollë publike apo private, është në interes të publikut dhe nuk mund të konsiderohet përndjekje.
Asociacioni shprehet i shqetësuar veçanërisht për një paragraf të postimit të Osmanit, ku thuhet:
“Asnjëherë, disa të ashtuquajtur gazetarë (për ndonjë prej tyre do të shokoheshit se me çfarë veprimtarie të kundërligjshme merren, sipas institucioneve tona të sigurisë), asnjëherë nuk kanë shkruar se presidentja e vendit i dërgon fëmijët në shkollë publike në Kosovë, përkundër sfidave të mëdha me të cilat përballej kjo shkollë”.
Sipas AGK-së, ky është një shantazh i hapur publik ndaj gazetarëve dhe mediave, i cili dëmton sigurinë juridike dhe lirinë e medias në vend:
“Ky është një mesazh i papranueshëm dhe i rrezikshëm që vjen nga kreu i shtetit dhe duhet të shërbejë si alarm për sigurinë juridike të secilit qytetar të Kosovës,” thuhet në komunikatën e AGK-së.
AGK-ja i ka bërë thirrje presidentes Osmani që të ndalë praktikat jodemokratike të sulmeve ndaj mediave dhe të ushtrojë postin me përgjegjësi, duke garantuar dhe ruajtur lirinë e medias, detyrë kjo e parashikuar edhe në Kushtetutën e Kosovës.
