Greqia është gjysmëfinalistja e dytë e Eurobasketit 2025.
Të martën mbrëma në Riga të Letonisë, Greqia fitoi ndaj Lituanisë në çerekfinale me rezultatin 87:76.
Ylli i NBA-së, Giannis Antetokounmpo udhëhoqi Greqinë me 29 pikë, gjashtë kërcime e dy asistime. Ai i kishte edhe katër topa të rrëmbyer e një bllokadë.
Vasileios Toliopoulos e përfundoi ndeshjen me 17 pikë, ndonëse luajti vetëm 16 minuta. Kostas Papanikolau i kishte tetë pikë, shtatë kërcime e tri asistime. Pikë dyshifrore kishte vetëm edhe Kostas Sloukas – 11.
Te Lituania u dallua Jonas Valanciunas me 24 pikë e plot 15 kërcime. Gytis Radzevicius i kishte 10 pikë e katër kërcime, ndërsa Arnas Velicka e përfundoi ndeshjen me 12 pikë, shtatë asistime e pesë kërcime.
Në gjysmëfinale, më 12 shtator, Greqia përballet me Turqinë.
