Avokati Tomë Gashi ka folur për raportet mes presidentes Vjosa Osmani dhe kryeministrit Albin Kurti, duke i cilësuar si të pandryshuara. Në emisionin “Këndi i debatit” në Tëvë1, ai theksoi se deklaratat e mëhershme të presidentes janë keqinterpretuar dhe nuk kanë nënkuptuar përçarje mes dy liderëve institucionalë.
“Veprimet e shkëlqyera të Albin Kurtit në veri, sikurse çdo herë, janë koordinuar me presidenten. Çdo veprim i bërë në veri nuk ka mundur të ndodhë pa informuar presidenten e vendit. Deklarata e saj e mëhershme është keqkuptuar dhe nuk ka nënkuptuar që ata nuk duan të shihen bashkë,” ka deklaruar Gashi.
Ai ka kujtuar edhe reagimet e mëhershme të partnerëve ndërkombëtarë, duke përmendur ambasadorin amerikan, dhe ka thënë se pa koordinimin me SHBA-të, sukseset në veri nuk do të ishin të mundshme.
“Ne nuk i kemi harruar deklaratat që janë dhënë se shtëpia mbahet me miq, e as ato të ambasadorit amerikan. Po të mos ishte mbështetja e SHBA-së, sukseset në veri do të ishin shumë më të vogla, madje as që do të ekzistonin. Nëse Amerika do të ishte kundër vendimeve të Kurtit, do të kishte vendosur dy ose tre ushtarë dhe nuk do ta lejonte realizimin e tyre,” u shpreh Gashi.
