Lidhja Demokratike e Kosovës ka reaguar pas caktimit të masës së përkohshme deri më 30 shtatorit nga Gjykata Kushtetuese lidhur me seancën konstituive pas kërkesës së Listës Serbe.
Në një komunikatë për media nga LDK është thënë se kjo masë tregon se kriza aktuale është pasojë e keqpërdorimit politik të procedurave nga Vetëvendosje.
“Gjykata Kushtetuese ka ndërhyrë me masë të përkohshme për të adresuar situatën, duke treguar se kriza aktuale nuk është pasojë e dispozitave kushtetuese, por e keqpërdorimit politik të procedurave nga Vetëvendosje. Ky veprim ka vënë në ngërç të paarsyeshëm një institucion themeltar të demokracisë parlamentare, duke lënë vendin pa funksionalitet të plotë institucional. LDK thekson se ky bllokim nuk ka asnjë justifikim politik apo institucional. Ai është rezultat i mungesës së gatishmërisë së Vetëvendosjes për dialog dhe kompromis, si dhe i qasjes së saj destruktive që vë interesin partiak mbi interesin e përgjithshëm shtetëror”, thuhet nga LDK.
Lidhja Demokratike e Kosovës ka bërë thirrje që të respektohen Kushtetuta, ligjet dhe fryma e demokracisë parlamentare.
“Kuvendi i Republikës së Kosovës duhet të konstituohet dhe të funksionojë menjëherë, në mënyrë që vendi të ketë institucione të qëndrueshme dhe legjitime, në shërbim të qytetarëve dhe të së ardhmes euroatlantike të vendit tonë.LDK mbetet e përkushtuar të veprojë me përgjegjësi institucionale dhe të angazhohet për të garantuar funksionimin demokratik të institucioneve të Republikës së Kosovës”, thuhet nga LDK.
