Konsulenti politik, Xhevdet Pozhari ka thënë se nuk mund të akuzohen deputetët që kanë votuar Dimal Bashën për kryetar të Kuvendit.
Ai ka thënë se qëllimi ka qenë që të votohet kryetari i Kuvendit dhe të zhbllokohet situata, por sipas tij tash është tjetër situatë, ku publikimi i një artikulli në të cilën denigrohet UÇK-ja bashkautor është Dimal Basha.
“Kemi pas debat dhe kemi qenë të gëzuar që më në fund e tejkaluam këtë ngërç, erdhëm në situatë me këto bllokada që zgjaten mbi 4 muaj që të votohet një kryeparlamentar dhe të zhbllokohen proceset. Tani është një situatë tjetër që po flasim pas ati punimi që u publiku, por e rëndësishme ka qenë themelimi i institucioneve dhe këtu kushdo që e ka votua Diaml Bashën s’mund t’i akuzosh, sepse qëllimi ka qenë të ecët tutje”, ka thënë Pozhari në emisionin “Këndi i Debatit” në Tëvë1.
Por, sipas Tomor Avdiaj,njohës i çështje politike, deputetët që kanë pasur informacione dhe e kanë votuar duhet të mbajnë përgjegjësi juridike dhe ligjore.
“Në qoftë se deputetë që kanë qenë pjesë e Komisionit të Sigurisë dhe ka shumë aty, e kanë ditë këtë fakt dhe kanë votuar kanë përgjegjësi. Komisioni për Mbikëqyrjen e AKI-së, i dijen të dhënat dhe nëse e kanë informacionin dhe kanë votuar, kanë përgjegjësi juridike dhe ligjore”, ka thënë ai në Tëvë1.
Kryetari i Kuvendit Dimal Basha, lidhur me publikimin ku figuron si bashkautor e në të cilin denigrohet UÇK-ja, ka thënë se nuk mbanë përgjegjësi.
Ai ka thënë se në këtë punim ka shkruar vetëm Kapitullin e 3- të.
Basha në një konferencë për media të enjten ka thënë se lufta e UÇK-së për të është e shenjtë.
