Sulmuesi i krahut, Milot Rashica mund të mos jetë në dispozicion të selektorit Franco Foda për ndeshjet e muajit të ardhshëm, me Zvicrën dhe Suedinë në kuadër të kualifikimeve për Botërorin 2026.
Rashica, do ti mungojë Beshiktashit në ndeshjen e kthimit ndaj Lausannet në “play-off” të Ligës së Konferencës, që luhet sonte prej orës 20:00.
Mungesa e Rashicës është konfirmuar edhe nga trajneri i Beshiktashit, Ole Gunnar Solskjaer, i cili ka thënë se sulmuesi i krahut nuk do të kthehet deri pas ndeshjeve të kombëtareve.
“Rashica nuk do të luaj për shkak se ka një dëmtim muskulor, dhe do të kthehet pas ndeshjeve ndërkombëtare”, është shprehur Solskjaer.
Selektori i Kosovës, Foda të premten publikon listën e futbollistëve të ftuar për ndeshjet e shtatorit dhe mbetet të shihet nëse Rashica do të jetë pjesë e këtij grumbullimi.
Kosova më 5 shtator luan në Basel ndaj Zvicrës, ndërsa tri ditë më vonë e pret Suedinë në Prishtinë.
