Skuadra kampione e Kosovës, Drita, ndodhet në prag të arritjes më të madhe në historinë e saj evropiane.
Sonte, ekipi nga Gjilani përballet me Differdange në Luksemburg, në ndeshjen e dytë të play-offit të UEFA Conference League.
Pas fitores 2:1 në ndeshjen e parë të zhvilluar në stadiumin “Fadil Vokrri” në Prishtinë, Drita ka siguruar një avantazh të lehtë, por jashtëzakonisht të rëndësishëm.
Ndeshja e kthimit, nis sonte nga ora 20:00, është pa diskutim më e rëndësishmja në historinë e klubit.
Pavarësisht avantazhit në rezultat, sfida e sontme nuk pritet të jetë e lehtë.
Sipas kompanive ndërkombëtare të basteve, Differdange shihet si favorit me kuotën 2.15 për fitore, ndërsa suksesi i Dritës është vlerësuar me koeficientin 3.20.
Nëse arrin suksesin sonte, Drita jo vetëm që do të shkruajë emrin e saj në historinë e futbollit kosovar, por do të përfitojë edhe një shpërblim të konsiderueshëm financiar nga UEFA.
Një kualifikim eventual do ta bënte Dritën skuadrën e dytë kosovare që luan në fazën e grupeve të Ligës së Konferencës, pas Ballkanit.
Nëse arrin në Ligën e Konferencës, klubi gjilanas do të fitojë të paktën 3 milionë e 170 mijë euro. Në fazën e ligës, Drita do të luante gjashtë ndeshje, me gjashtë kundërshtarë të ndryshëm.
Secila fitore do të vlente 400 mijë euro, ndërsa barazimi do të vlente 133 mijë euro.
