Mbi 345 metra material fizik tashmë ruhen në arkivat e Institutit te Krimeve të Kryera gjatë Luftës. Kështu tha kryeministri në detyrë, Albin Kurti gjatë prezantimit të aneksit të Metodologjisë së punës së Institutit të Krimeve të Kryera Gjatë Luftës (IKKL) për dokumentimin dhe hulumtimin e krimeve ekonomike.
Kurti tha se me dokumentimin e krimeve ekonomike gjatë luftës në Kosovë mund të krijohet një arkiv i besueshëm.
“Ky proces është obligim moral ndaj viktimave dhe obligim kombëtar – na shërben për ballafaqimin me të kaluarën. Lufta në Kosovë ishte projekt i shkatërrimit dhe asgjësimit, andaj dokumentimi i tyre është jetik. Krahas dëmit të jashtëzakonshëm, në Kosovë janë shkaktuar edhe dëme të pallogaritshme ekonomike përfshirë djegien e pronave publike dhe private”, tha Kurti.
Ai shtoi se çdo material i mbledhur tregon se krimet nuk po harrohen.
Drejtori i Institutit të Krimeve të Kryera gjatë Luftës, Atdhe Hetemi theksoi se Instituti nuk është vetëm arkiv, dhe sipas tij, po ndërtohet edhe si platformë.
“Që nga fillimi të gjitha dokumentet që e përbejnë kornizën ligjore janë hartuar në bashkëpunim të ngushtë me institucionet vendore. Aneksi metodologiik që do të prezantohet sot është vazhdimësi e kësaj pune. Sot qëllimi ynë është i qartë që të përfitojnë nga ekspertiza juaj që ta përmirësojmë këtë aneks”, tha ai.
