Leart Paqarada, mbrojtësi i përfaqësueses së Kosovës, po kalon një moment të vështirë në karrierën e tij te klubi gjerman FC Köln. Trajneri i ri i ekipit, Lukas Kwasniok, ka marrë një vendim të fortë në lidhje me përbërjen e skuadrës, duke lënë jashtë planeve të tij tre lojtarë, mes të cilëve edhe Paqarada.
“Skuadra ishte shumë e madhe dhe u desh të merrja një vendim. Zgjodha këta tre lojtarë. Tani po stërviten individualisht me stafin teknik. Këto janë vendime të hidhura, që janë të vështira nga ana njerëzore dhe më lëndojnë”, tha Kwasniok për mediat gjermane.
Ky vendim hedh hije mbi të ardhmen e Paqaradës te FC Köln, me shumë gjasa duke i hapur rrugë një largimi të mundshëm nga klubi. Paqarada iu bashkua ekipit gjerman me shumë pritshmëri, por duket se nuk ka arritur të bindë trajnerin e ri për të qenë pjesë e planeve të sezonit të ri.
Në moshën 30-vjeçare, mbrojtësi i majtë është ende në kulmin e karrierës dhe do të kërkojë një destinacion të ri ku mund të ketë më shumë hapësira dhe të rikthehet në formën më të mirë, sidomos duke pasur parasysh angazhimet me kombëtaren e Kosovës.
Tashmë mbetet për t’u parë nëse një transferim i mundshëm do të ndodhë gjatë afatit kalimtar, apo nëse situata do të ndryshojë brenda klubit në ditët në vijim.
