Monitorimi po bëhet gjatë natës.
Të parët që i vërejtën këto lëvizje të pazakonta të disa dronve në afërsi të liqenit të Batllavës në Podujevë, janë banorët e kësaj zone, të cilët më pas i raportuan tek organet e rendit.
Këto pamje i ka siguruar Tëvë1 ku shihet një dron që sipas burimeve, dyshohet të jetë nga Serbia, që për synim, dyshohet se kishin filmimin e infrastrukturës kritike mbi pendën e Batllavës aty ku bëhet derdhja e ujit që shfrytëzohet pastaj për pije.
E gjithë kjo ka ndodhur më 21 qershor rreth orës 12 deri në 02 të natës.
Jo vetëm në këtë zonë, dronët e dirigjuar nga Serbia, pamje të tilla dyshohet se kanë marrë nga qielli edhe mbi Burgun e Sigurisë së Lartë në fshatin Gërdofc, mëson Tëvë1.
Më 16 qershor të vitit 2025 prej orës 23:47, roja kazermës së FSK, ka vërejtur 6 dronë që kanë vëzhguar hapësirën e kazermës, 2 prej tyre brenda oborrit kanë operuar 7-8 minuta, thonë tutje burime për Tëvë1.
Televizioni ka kërkuar përgjigje nga Policia e Kosovës, departamenti i kufirit.
Por ata kanë thënë që pyetjet duhet drejtuar Agjencisë së Aviacionit Civil dhe KFOR-it.
Nga KFOR-i, kanë thënë për Tëvë1 se hetimet deri më tani tregojnë se nuk ka rrezik për sigurinë në zonë.
“Lidhur me pyetjet tuaja, pas shqyrtimit të çështjes, vëzhgimet tona nuk kanë zbuluar ndonjë kërcënim për sigurinë në zonë. Ne do të vazhdojmë të monitorojmë nga afër situatën në bashkëpunim të ngushtë me palët e interesuara të sigurisë”, thanë nga KFOR-i.
Ndërsa sipas njohësit të sigurisë, Nuredin Ibishi, presidenti serb Aleksandër Vuciq po përdor shërbimet komerciale që të vendos në sistem marrjen e filmimeve në disa zona të ndjeshme të Kosovës.
“Serbia jo vetëm nga sektori i sigurisë, por edhe nga shërbimet komerciale civile ajo dinë t’i fusë në sistem dhe të bëjnë vëzhgimet për nevoja të tyre, sidomos në pjesën e errët gjegjësisht natën, me sistemin e dronëve, infra të kuqe ku detekton saktësisht, në bazë të ndryshimit të temperaturës të objekteve të caktuara edhe infrastrukturës kritike por edhe prezencës së njerëzve, kjo është e rrezikshme”, tha Ibishi.
Përveç kësaj, Ibishi thekson se Vuçiq dëshiron që këto filmime pastaj t’i përdor në ndonjë situatë eventualisht të tensionuar në Kosovë, për qëllime veprimi.
“Në këtë mënyrë të bëhet sa më e mundshme që të mbrohemi edhe nga ky rrezik dhe kërcënim për arsyeje edhe të vëzhgimit por edhe mundësisë që, në situatë hipotetike ata mund t’i shfrytëzojnë këto të dhëna gjegjësisht këto incizime këto imazhe për veprime të caktuara”, tha ai.
Tëvë1 ka dërguar pyetje edhe në Forcën e Sigurisë së Kosovës, por të njëjtit ka thënë se nuk posedojnë informacione të tilla.
As Agjencia e Aviacionit Civil nuk ka kthyer përgjigje.
