Mbi shinat e kësaj hekurudhe të trenit e para që lëvizi pas disa muajsh pauze është kjo makineri.
E përmes saj u bë testimi i linjës hekurudhore Fushë-Kosovë – Ferizaj.
Kryeshefi ekzekutiv i ndërmarrjes “Infrakos”, Naser Krasniqi, ka dhënë detaje për mundësitë që ofron kjo linjë dhe për ecurinë e rehabilitimit të saj.
“Rihapja e linjës hekurudhore për transportin e udhëtarëve në relacionin Fushë-Kosovë – Ferizaj dhe për transportin e mallrave në relacionin Fushë-Kosovë – Gurëz, bëhet në kuadër të rehabilitimit të linjës 10 hekurudhore. Ky projekt është një ndër më të rëndësishmit në infrastrukturën e vendit”, tha Krasniqi.
Megjithëse linja është rihapur, lëvizja e trenave është aktualisht e kufizuar në shpejtësi, porse në hapjen e radhës kjo shpejtësi do të mund të arrij deri në 120 km/h.
Tutje nga Infrakos treguan edhe që vendosja e sinjalistikave është projekt i veçantë, po sa të sigurohen mjete financiare do të filloj edhe ky proces.
“Ky segment i sapo përfunduar është plotësisht funksional dhe nga sot është i hapur për operatorët hekurudhorë, me një shpejtësi lëvizjeje deri në 60 km/h. Dua të theksoj se ky kufizim është i përkohshëm dhe lidhet me mungesën e sinjalistikës, e cila është një komponent thelbësor për sigurinë dhe efikasitetin e transportit hekurudhor”, tha ai.
Krasniqi njoftoi gjithashtu se gjatë fazës së parë dhe të dytë të rehabilitimit të linjës 10, janë realizuar një sërë punimesh të rëndësishme.
“Gjatë periudhës 1 janar 2023 deri më sot, janë përfunduar punimet në Tunelin 3, 6 dhe 7., punimet në Tunelin 1, 2 dhe 5 të cilat janë në progres, demontimi i 123 kilometrave të linjës së vjetër, përfshirë edhe binarët në stacione. Po ashtu janë finalizuar këto punë: Montimi i 86 km të linjës së re përfshirë ndërtimin e tri shtresave te trasesë hekurudhore, duke lënë vetëm edhe 6 km deri ne Mitrovice, 3 km mbrojtëse te pjerrtësive”, tregoi Krasniqi.
Nga Infrakos bëjnë të ditur se, në kuadër të këtij rehabilitimi të përgjithshëm të linjës 10 hekurudhore, janë duke u restauruar edhe stacionet hekurudhore dhe objektet përcjellëse të kësaj linje, të cilat pritet të marrin një pamje krejtësisht të re.
