Mesfushori i Kombëtares së Shqipërisë, Kristjan Asllani, më në fund është bërë me skuadër të re.
Asllani do të jetë pjesë e skuadrës së Torinos, e cila ka arritur marrëveshje si me Interin ashtu edhe futbollistin 23-vjeçar.
Torino do ta huazojë Asllanin për një vit dhe do të paguajë 1.5 milionë euro, ndërsa do të paguajë edhe 12 milionë euro për blerjen e kartonit të tij verën tjetër.
Mesfushori shqiptar ka refuzuar kalimin te disa skuadra këtë verë edhe pse nuk bënte pjesë në planet e trajnerit të Interit, Christian Chivu dhe ishte nxjerrë në shitje.
Ai refuzoi kalimin te Real Betisi, Sassuolo e Bologna kurse në garë për shërbimet e tij ishte edhe skuadra e Fiorentinës.
Asllani ishte pjesë e Interit prej vitit 2022 dhe me këtë skuadër fitoi katër trofe të futbollit italian, një titull kampioni, një Kupë dhe dy Superkupa kurse ka luajtur edhe për Empolin.
