Të mërkurën mbrëma, FC Basel do të përballet me FC Kopenhagen në sfidën e parë të “play-off”-it për një vend në fazën e grupeve të Ligës së Kampionëve. Por për kapitenin Xherdan Shaqiri, kjo ndeshje është më shumë se një betejë për kualifikim – është përpjekja për të përmbushur ëndrrën e fundit me klubin e zemrës.
“Kur vendosa të kthehem në Basel, e bëra me një synim të qartë: të përjetoj sërish magjinë e netëve të Ligës së Kampionëve në Joggeli”, u shpreh Shaqiri në konferencën për shtyp. “E kam fituar titullin kampion dhe Kupën, por për mua mungon diçka – Liga e Kampionëve me FCB. Kjo është ëndrra ime e fundit dhe këto dy ndeshje janë jetike.”
33-vjeçari, i cili ka një karrierë të pasur me klube si Bayern Munich, Liverpool dhe Inter, nuk e fsheh se është i vetëdijshëm për peshën e sfidës. Ai e sheh FC Kopenhagen si favorit për shkak të eksperiencës së tyre në garat evropiane, por beson se FC Basel ka potencialin për të befasuar.
“E dimë që nuk do të jetë e lehtë. Kopenhagen ka më shumë përvojë, është ekip i organizuar dhe i fortë, por ne kemi cilësitë tona. Do të jenë detajet që do të bëjnë diferencën. Nëse luajmë siç dimë dhe besojmë në veten tonë, mund të arrijmë shumë.”
Shaqiri është kthyer në një lider të vërtetë për skuadrën e trajnerit Ludovic Magnin, i cili vetë e ka quajtur këtë ndeshje “më të rëndësishmen e karrierës” së tij si trajner. Mes emocioneve dhe presionit, është e qartë se baza e këtij projekti është ndërtuar rreth figurës së Shaqirit – jo vetëm si futbollist, por si simbol i një klubi që dëshiron të rikthehet në elitat e futbollit evropian.
“Për ne kjo është më shumë se një kualifikim, është një mesazh. FC Basel është ende këtu, dhe ne kemi akoma për të dhënë në nivelin më të lartë,” përfundoi Shaqiri.
Sfida e parë zhvillohet në “Joggeli”, ku atmosfera pritet të jetë elektrizuese. Një rezultat pozitiv në shtëpi do të ishte hapi i parë drejt një rikthimi që Shaqiri – dhe gjithë tifozët e Basel – e kanë pritur prej kohësh: rikthimi në Ligën e Kampionëve.
